დეიმონ ვილსონი – არ მგონია, ვინმეს იმის ილუზია ჰქონდეს, რომ ვარშავის სამიტის შემდეგ საქართველო ნატო-ს წევრი გახდება

არ მგონია ვინმეს იმის ილუზია ჰქონდეს, რომ ვარშავის სამიტის შემდეგ საქართველო ნატო-ს წევრი გახდება, – ამის შესახებ “ამერიკის ხმის” ქართული რედაქციისთვის მიცემულ ინტერვიუში ატლანტიკური საბჭოს აღმასრულებელმა დირექტორმა დეიმონ ვილსონმა განაცხადა.
მისი თქმით, საქართველომ ბევრი მნიშვნელოვანი ვალდებულება შეასრულა.
“მთლიანობაში ინტეგრაციას რაც შეეხება, ევროპის კავშირთან ურთიერთობების მშენებლობის პარალელურად ბევრი რამ გასაკეთებელი რჩება. პირველ რიგში, ეს ქართველებისთვის მათი დემოკრატიული ინსტიტუტების რწმენის ჩამოყალიბებაა, იგივე ეხება საერთაშორისო საზოგადოებას. ეს თემები გამოცდებს გადის, საქართველო ახალგაზრდა ქვეყანაა”, – განაცხადა ვილსონმა.
ატლანტიკური საბჭოს აღმასრულებელი დირექტორი მიიჩნევს, რომ არსებითად მნიშვნელოვანია კანონის უზენაესობა, მედიის თავისუფლება, პოლიტიკური პლურალიზმი და ამ თემებზე დებატების შესაძლებლობა.
“ბევრ დარგში საქართველო თავის ყველა მეზობელს და რეგიონის ყველა ქვეყანას წინ უსწრებს, მაგრამ არსებობს საკითხები, რომლებსაც ყურადღებით დავაკვირდებით და შევისწავლით. ვფიქრობ, ეს სამართლიანია, თუ გინდა ტრანსატლანტიკური საზოგადოების ნაწილი იყო, მაშინ შენ მეტად დაგაკვირდებიან, ვიდრე მას, ვისაც იგივე მისწრაფებები არ აქვს”, – განაცხადა ვილსონმა.
როგორც ვილსონმა აღნიშნა, მას სჯერა საქართველოს მისწრაფებების, მისი ამჟამინდელი და წარსული მთავრობების დასავლური ორიენტაციის.
მისივე თქმით, ქვეყნის ორიენტაცია, განსაკუთრებით ატლანტიკური მისწრაფებები, საქართველოში განსხვავებული მოსაზრებების მქონე ჯგუფებს აერთიანებს.
კითხვაზე – რუსეთი მკვეთრად და ხმამაღლა ეწინააღმდეგება ნატო-ს გაფართოებას და რა ქმედითი ნაბიჯები შეიძლება ამას მოჰყვეს რუსეთისგან, დეიმონ ვილსონს არ ჰგონია, რომ რუსეთმა მონტენეგროს წინააღმდეგ რამე კონკრეტული ნაბიჯები გადადგას.
“გაფართოების პროცესს უფრო მეტი სიცხადე და თავდაჯერებულობა ახლავს და ის ზრდის იგივე რუსეთთან სტაბილური თანამშრომლობის შესაძლებლობებს. მაგალითად, რუსეთ-პოლონეთის ურთიერთობა დღეს ბევრად უფრო სტაბილური სწორედ პოლონეთის ნატო-ში წევრობის გამოა, იგივეს ველოდები მონტენეგროში. გულწრფელად მგონია, რომ გრძელვადიან პერსპექტივაში საქართველოშიც იგივე შედეგს ვნახავთ. საქართველოს რუსეთთან ბევრად უფრო ნორმალური ურთიერთობა ექნება თუ ის ნატო-ს წევრი გახდება. ვშიშობ, რომ ამასობაში რუსეთი შანსებს გამოიყენებს, ის შეეცდება სუსტი წერტილები გამოიყენოს, შეეცდება მის საზღვართან ნატო-ს გავრცელება შეაფერხოს. ამიტომაცაა მნიშვნელოვანი, რომ საქართველო, უკრაინა და მოლდოვა რუსეთის სუსტი სამიზნეები არ იყვნენ, არამედ ჰქონდეთ მყარი სახელმწიფო ინსტიტუტები და განავითარონ თავდაცვის სფერო”, – განაცხადა ვილსონმა.
რაც შეეხება ვარშავის სამიტთან დაკავშირებით არსებულ მოლოდინებს, დეიმონ ვილსონი აცხადებს, რომ ყოველი სამიტი ურთიერთობების შეჯამების და დაახლოების შანსია.
“არ მგონია ვინმეს იმის ილუზია ჰქონდეს, რომ ვარშავის სამიტის შემდეგ საქართველო ნატო-ს წევრი გახდება. ზოგადად, ბევრი რამ გაურკვეველია. გადაწყვეტილებები, რომლებსაც ჩვენ დღეს ვიღებთ, ვარშავამდე შეიძლება ძალაში არც იყოს. ნახეთ, როგორ შეცვალა უკრაინის ამბებმა ვითარება უელსის სამიტის წინ, ნახეთ, როგორ ცვლის პოლიტიკას სირია და “ისლამური სახელმწიფო”. ასე რომ, ჯერ ნაადრევია ვარშავის სამიტის კონკრეტულ შედეგებზე საუბარი, მე დიდ ცვლილებებს არ ველოდები. ნატო-საქართველოს უფრო მყარი და ახლო ურთიერთობები სამომავლოდ ალიანსის საზღვრების გაფართოებაზე პოლიტიკური მხარდაჭერისთვის მოგვამზადებს”, – განაცხადა ვილსონმა.

მსგავსი სიახლეები
174 ნახვა