როგორ ვიმოგზაურებთ ევროპაში? – ინსტრუქცია მათთვის, ვინც უვიზო მიმოსვლას ელოდება

„გილოცავთ!” – მართალია, ევროკომისიას ჯერ ოფიცალური განცხადება არ გაუკეთებია, მაგრამ გახარებულ საქართველოში ოვაციები უკვე ისმის – ევროკავშირის წევრ ქვეყნებთან უვიზო მიმოსვლა ამოქმედდება. პრემიერმა ირაკლი ღარიბაშვილმა დღეს დილით განაცხადა კიდეც, ვიზალიბერალიზაციასთან დაგაკავშირებით ევროკომისიამ პოზიტიური დასკვნა მომზადა, ევროკავშირის წარმომადგენლებმა მომილოცესო.

როდის ამოქმედდება ევროკავშირის წევრ ქვეყნებთა უვიზო რეჟიმი, რას გულისხმობს ეს რეჟიმი და როგორ უნდა იმოქმედოს საქართველოს მოქალაქემ, როდესაც მას ევროპაში უვიზოდ თავისუფლად შეეძლება მიმოსვლა? – „პოლიტკომერსანტი” კიდევ ერთხელ ეცდება გაარკვიოთ ამ სიტუაციაში.

დავიწყოთ იმით, რომ ვიზალიბერალიზაციასთან დაკავშირებით ევროკომისიის დასკვნის გამოქვეყნება არ ნიშნავს მაშინვე უვიზო მიმოსვლის დაწყებას. ევროპის ქვეყნებში ვიზის გარეშე გამგზავრება, სავარაუდოდ, ამ დასკვნის გამოქვეყნებიდან 6-7 თვეში იქნება შესაძლებელი.

უვიზო რეჟიმი გულისხმობს თავისუფალ გადაადგილებას შენგენის ზონის ტერიტორიაზე, რომელიც მოიცავს ევროკავშირის 22 წევრ ქვეყანას, ევროკავშირის 4 არაწევრ ქვეყანას და შენგენის 4 კანდიდატ ქვეყანას.

წევრი ქვეყნები: ავსტრია, ბელგია, გერმანია, დანია, ესპანეთი, ესტონეთი, იტალია, ლატვია, ლიტვა, ლუქსემბურგი, მალტა, ნიდერლანდები, პოლონეთი, პორტუგალია, საბერძნეთი, საფრანგეთი, სლოვენია, სლოვაკეთი, უნგრეთი, ფინეთი, შვედეთი, ჩეხეთი.

არაწევრი ქვეყნები: ისლანდია, ლიხტენშტეინი, ნორვეგია და შვეიცარია;

კანდიდატი ქვეყნები: ბულგარეთი, კვიპროსი, რუმინეთი, ხორვატია;

გამონაკლისს წარმოადგენს ევროკავშირის 2 წევრი ქვეყანა: დიდი ბრიტანეთი და ირლანდია. ამ ქვეყნების ვიზის მისაღებად საქართველოს მოქალაქეებმა შესაბამის საკონსულო სამსახურებს უნდა მიმართონ.

უვიზო რეჟიმი შესაძლებლობას აძლევს საქართველოს მოქალაქეებს ვიზის გარეშე განახორციელონ მხოლოდ მოკლევადიანი ვიზიტები – მოკლევადიანი ვიზიტი გულისხმობს 90 დღეს ნებისმიერი 180 დღის განმავლობაში. ევროკავშირის/შენგენის ქვეყნებში 90 დღის პერიოდით ყოფნის შემდეგ საქართველოს მოქალაქემ უნდა დატოვოს ამ ქვეყნის ტერიტორია. ევროკავშირის/შენგენის სივრცეში მომდევნო შესვლა შესაძლებელია მომდევნო 90 დღის (ჯამში 180 დღე) პერიოდის გასვლის შემდეგ;

ცნობისთვის, მოკლევადიანი ვიზიტი შესაძლებელია განხორციელდეს სხვადასხვა მიზნით – ტურისტული, ოჯახის წევრების/ახლობლების მონახულება, ბიზნეს-შეხვედრები, მოკლევადიანი სასწავლო და გაცვლითი პროგრამები/ტრეინინგი, კურსები, კულტურულ ან სამეცნიერო ღონისძიებებში მონაწილეობა, მკურნალობა და სხვა. ნებისმიერი ასეთი ვიზიტის ხანგრძლივობა კი, არ უნდა აღემატებოდეს 90 დღეს;

უვიზო რეჟიმი არ შეეხება ევროკავშირის/შენგენის წევრ სახელმწიფოებში გრძელვადიან ვიზიტებს განათლების მიღების, მუშაობის ან სხვა მიზნით;

ევროკავშირის/შენგენის წევრი ქვეყნის ტერიტორიაზე ხანგრძლივი პერიოდით დარჩენის სურვილის შემთხვევაში, საქართველოს მოქალაქეებმა უნდა მიმართონ საქართველოში აკრედიტებულ შესაბამისი ქვეყნის საკონსულოს ვიზის მისაღებად.

90 დღიან პერიოდში ევროკავშირის/შენგენის ტერიტორიაზე მრავალჯერადი შესვლაც არის შესაძლებელი. თუმცა საჭიროა დარწმუნდეთ, რომ თქვენი ვიზიტის ხანგრძლივობა არ აღემატება ჯამში 90 დღეს უკანასკნელი 180 დღის განმავლობაში.

არ გეგონოთ, ევროკავშირის/შენგენის ტერიტორიაზე შესვლას ყოველგვარი შემოწმების ად დამატებითი კითხვებისა და საბუთების გარეშე შეძლებთ. მაგალითად, სასაზღვრო სამსახურის წარმომადგენელმა ბიომეტრიულ პასპორტთან ერთად, შესაძლოა მოგთხოვოთ უკან დასაბრუნებელი სამგზავრო ბილეთი, სასტუმროს ჯავშანი, სამოგზაურო დაზღვევა, მოგზაურობის ფინანსური უზრუნველყოფის დამადასტურებელი დოკუმენტი. თუ კონფერენციებში, სემინარებში, საქმიან შეხვედრებში მონაწილეობთ, საჭიროა მოწვევა/პროგრამის წარდგენა. მკურნალობის შემთხვევაში კი, იმ სამედიცინო დაწესებულების თანხმობა, რომელშიც გეგმავთ მკურნალობას ან/და საქართველოს სამედიცინო დაწესებულების რეკომენდაცია, ჩაიტაროთ შესაბამისი მკურნალობა ევროკავშირის წევრ-ქვეყანაში.

რა თქმა უნდა, ეს წესების სრული ჩამონათვალი არ არის… ჯერ დაველოდოთ ვიზალიბერალიზაციის შესახებ ევროკომისიის დასკვნას, შემდეგ უვიზო მიმოსვლის ამოქმედებას და ამის შემდეგ, უფრო დეტალურად გაეცანით იმ წესებს, რომელიც ევროპის, ამ შემთხვევაში კი საქართველოს მოქალაქემ უვიზო მიმოსვლისას უნდა დაიცვას.

წყარო

მსგავსი სიახლეები
5,963 ნახვა