ნიკა გვარამია მოსამართლემ დარბაზიდან გააძევა

მოსამართლე ურთმელიძის გადაწყვეტილება მოჰყვა გვარამიას რეპლიკას “არაფერი არ იცის”. მოსამართლის განცხადებით, გვარამიას რეპლიკა შეურაცხყოფდა სასამართლოს და მანდატურებს მიმართა “გაეძევებინათ”.

სასამართლო პროცესზე, რომელზეც რუსთავი 2 -ს წინააღმდე ქიბარ ხალვაშის სარჩელის არსებითი განხილვა მიმდინარეობს, თავაპირველად შელაპარაკება დაიწყო მოსამართლესა და რუსთავი 2-ის ადვოკატ ზაზა ბიბილაშვილს შორის.  მას შემდეგ, რაც მოსამართლემ არ დააკმაყოფილა შუამდგომლობა პროცესის გადადების შესახებ,  ზაზა ბიბილაშვილმა განაცხადა, რომ მოსამართლე მათ უფლებებს არღვევდა.

მოსამართლე ურთმელიძემ თქვა, რომ ძალიან მწვავე განცხადებები ისმოდა სასამართლოს მიმართ და სასამართლო ცდილობდა, რომ კონსტრუქციულ რეჟიმში წაეყვანა სხდომა. მან ბიბილაშვილს მიმართა, რომ შეეძლო მოსამართლის განჩინება გაესაჩივრებინა.

“ყველამ იცის როგორ ჩააბარე [მოსამართლეთა ] გამოცდები და არაფერი არ იცი”, – ასე მიმართა გვარამიამ მოსამართლეს.
სასამართლოს სხდომა დატოვეს  რუსთავი 2 -ის ჟურნალისტებმაც.

დღეს მოსამართლემ არ დააკმაყოფილა არც ერთი შუამდგომლობა, რომელიც მოპასუხე მხარემ, რუსთავი 2-მა დააყენა.  ერთ-ერთი მოსამართლის აცილებას შეეხებოდა, მეორე კი სხდომის გადადებას.

ნიკა გვარამია

ნიკა გვარამია

სარჩელი რუსთავი 2-ის წინააღმდეგ

ქიბარ ხალვაშმა რუსთავი 2-ის წინააღმდეგ სასამართლოში  სარჩელი  2015 წლის 4 აგვისტოს შეიტანა.  ხალვაში “რუსთავი 2″–ისგან 500 000 აშშ დოლარის ოდენობით კომპენსაციას, ასევე ამჟამინდელი მეწილეების, პარტნიორების საკუთრების გაუქმებას და მესაკუთრეებად  ქიბარ ხალვაშის 60%-იანი და შპს “პანორამის” 40%–იანი წილების ცნობას ითხოვს. ამ მოთხოვნებს კიდევ 18 მილიონი აშშ დოლარი დაემატა, რომელსაც ხალვაში რუსთავი 2-ისგან კომპენსაციის სახით ითხოვს.

აგვისტოში ხალვაშმა სარჩელის უზრუნველყოფის მიზნით, მოითხოვა რუსთავი 2-ის ქონების დაყადაღება, რაც სასამართლომ დააკმაყოფილა. ქონების დაყადაღების გარდა, სასამართლომ  დირექტორსა და მეწილეებს შეუზღუდა გარკვეული უფლებები, კერძოდ, არსებული ქონების გასხვისება და უფლებრივად დატვირთვა, ვალდებულებების აღება, პროკურის გაცემა, წლიური შედეგების დამტკიცება, საზოგადოების რეორგანიზაცია და ლიკვიდაცია, წესდებაში ცვლილების შეტანა და სხვა.

1 ოქტომბერს  ცნობილი გახდა, რომ ხალვაშის მიმართვის საფუძველზე თბილისის საქალაქო სასამართლომ ტელეკომპანია რუსთავი 2-ის 51% წილის მფლობელი შპს “ტელეკომპანია საქართველოს” წილებიც დააყადაღა.

ხალვაშის ადვოკატმა პაატა სალიამ 1 ოქტომბერს განაცხადა, რომ სასამართლოში მიმართვის საფუძველი გახდა “ტელეკომპანია საქართველოს” წილის გასხვისება, რაც  იწვევდა ტელეკომპანია “რუსთავი 2”-ში 51%-იანი წილის მფლობელის ცვლილებას.

საჯარო რეესტრში 29-30 სექტემბერს განთავსებული დოკუმენტაციის მიხედვით, ტელეკომპანია საქართველოში გიორგი ყარამანიშვილის 40%-იანი და ლევან ყარამანიშვილის 60%-იანი წილები დიმიტრი ჩიქოვანმა შეისყიდა 400 ათას აშშ დოლარად. ჩიქოვანი საქართველოს თავდაცვის ყოფილი მინისტრის, დავით კეზერაშვილის ცოლისძმაა. კეზერაშვილს საქართველოში რამდენიმე მუხლით აქვს ბრალი წარდგენილი, რის გამოც მას ქვეყანა დატოვებული აქვს და საფრნაგეთში ცხოვრობს.

საჯარო რეესტრის დოკუმენტების მიხედვით, ეს თანხა ჩიქოვანს ძმებ ყარამანიშვილებისთვის ორ ტრანშად უნდა გადაეხადა: 200 ათასი 31 ოქტომბრამდე და დარჩენილი 200 ათასი – 2016 წლის 31 იანვრამდე.

ამას გარდა, განსაკუთრებული პირობების გრაფაში მითითებულია, რომ ტელეკომპანია საქართველოს 51%-იანი წილი რუსთავი 2-ში შეადგენს 6 მილიონ აშშ დოლარს და ახალმა მეპატრონემ გრაფიკით უნდა გამოყოს ეს თანხა პირდაპირი ან არაპირდაპირი ინვესტიციის სახით.

“ტელეკომპანია საქართველოს” მეწილეების ეს ცვლილება საჯარო რეესტრმა არ დაარეგისტრირა, რაც იმას ნიშნავს, რომ დაყადაღების შემდეგ მეწილეები ვეღარ შეიცვლება.

რუსთავი 2-ის გენერალურმა დირექტორმა ეს ფაქტი შეაფასა, როგორც ხელისუფლების მიერ ტელეკომპანიის ფაქტობრივი დახურვა და თანამშრომლებთან და ადვოკატთან ერთად საგანგებო ბრიფინგი გამართა.

წყარო

მსგავსი სიახლეები
226 ნახვა